Pictures ភ្នំពេញ: ក្រុមហ៊ុន Sun Active Ad និង Bite Production បានសហការគ្នារៀបចំកម្មវិធី “Cambodia New Star Model Contest-Face of Cambodia 2013” នៅមជ្ឈមណ្ឌលកម្សាន្តថោន ក្រោមវត្តមានយ៉ាងច្រើនកុះករពីសំណាក់តារាសម្តែង តារាបង្ហាញម៉ូដ និងអ្នកសារព័ត៌មានជាច្រើន។ បេក្ខជន និងបេក្ខនារីទាំងអស់ ដែលចូលរួមជាបេក្ខភាពប្រកួតប្រជែងក្នុងកម្មវិធីនេះ សុទ្ធសឹងជាតារាបង្ហាញម៉ូដនៃក្រុម Sun Super Models Cambodia ដែលជាក្រុមបង្ហាញម៉ូដកំពុងល្បីល្បាញក្នុងប្រទេសកម្ពុជា កាលពីល្ងាចថ្ងៃទី១១ ខែធ្នូ ឆ្នាំ២០១២។លោក ម៉ែន និមលរតន៍ នាយកគ្រប់គ្រងទូទៅក្រុមបង្ហាញម៉ូដ Sun Super Models Cambodia បានមានប្រសាសន៍បញ្ជាក់ឲ្យដឹងថា “កម្មវិធី Cambodia New Star Model Contest-Face of Cambodia 2013 ត្រូវបានរៀបចំឡើង ដើម្បីជ្រើសរើសយកបេក្ខនារីជ័យលាភី១រូប ទៅចូលរួមក្នុងកម្មវិធី Miss Tourism International 2012 នៅប្រទេសម៉ាឡេស៊ី និងបេក្ខជននិងបេក្ខនារីជ័យលាភី ២រូបទៀត ទៅចូលរួមក្នុងកម្មវិធី Asia New Face Model Contest 2013 នៅប្រទេសកូរ៉េ។ នេះជាជំហានថ្មីមួយទៀតក្នុងការផ្តល់ឱកាសឲ្យតារាបង្ហាញម៉ូដខ្មែរ យើងបានបង្ហាញវត្តមាននៅលើឆាកអន្តរជាតិ”។
កម្មវិធីមួយនេះ អាចដំណើរការទៅបានដោយមានការឧបត្ថម្ភធំពី Cosmetic L’Oréal និងហាងកែសម្ផស្ស Slim Beauty House និងសហការឧបត្ថម្ភដោយហាងកាត់ដេរធារិកាដើម ហាងកាត់ដេរ La Female ទឹកផ្លែឈើម៉ារី ហាងថតរូប I Photo ហាងកាត់ដេរខ្មែរឌីហ្សាញ និងមជ្ឈមណ្ឌលកម្សាន្ត ថោន។
ចំពោះកម្មវិធី Cambodia New Star Model Contest វិញ មានការចូលរួមដាក់ពិន្ទុពីសំណាក់គណៈកម្មការ ដែលមានបទពិសោធន៍ខ្ពស់ និងជាតំណាងមកពីក្រសួងវប្បធម៌ តំណាងមកពីប្រទេសកូរ៉េ និងលោកស្រី សុន ស្រីមុំ (អតីតបេក្ខភាព Miss World ឆ្នាំ២០០៦) ជាដើម។
គួរបញ្ជាក់ដែរថា កម្មវិធី Miss Tourism International តែងតែមានរៀបចំកម្មវិធី Asia New Face Model Contest គឺជាកម្មវិធីប្រកួតជ្រើសរើសតារាបង្ហាញម៉ូដដ៏ធំមួយផងដែរ ដែលតែងតែមានការរៀបចំឡើងជារៀងរាល់ដើមឆ្នាំនៅប្រទេសកូរ៉េ ដោយមានការចូលរួមពីប្រទេសចំនួន១៦ នៅទ្វីបអាស៊ី។ ទាំងនេះគឺជាលើកទី១ហើយ ដែលកម្ពុជាមានឱកាសរៀបចំកម្មវិធីនេះឡើង ដើម្បីជ្រើសរើសតារាបង្ហាញម៉ូដតំណាងប្រទេស ទៅចូលរួមកម្មវិធីច្រកួតនៅប្រទេសទាំងពីរនេះ។
សូមរំឭកថា ក្រុម Sun Super Models Cambodia ត្រូវបានបង្កើតឡើងក្នុងឆ្នាំ ២០១០។ ចាប់តាំងពីបង្កើតឡើងរហូតមកដល់ពេលនេះ Sun Super Models Cambodia តែងតែមានឱកាសចូលរួមបង្ហាញមុខនៅតាមកម្មវិធីធំៗលំដាប់ថ្នាក់ជាតិ និងអន្តរជាតិជាច្រើន ដូចជាកម្មវិធីបង្ហាញម៉ូដនៅប្រទេសវៀតណាមចំនួន ២លើក កម្មវិធីបុណ្យឆ្នេរ និងកម្មវិធី Manhunt International 2012 ដែលមានការចូលរួមពីសំណាក់ប្រទេសចំនួន៥៥ ជាដើម៕
0 comments:
Post a Comment