ក្រុមអ្នកប្រើប្រាស់អ៊ែនដ្រយដ៍កម្ពុជាហៅកាត់ថា CAUG ប្រកាសជាសាធារណៈថា រាល់អ្នកប្រើប្រាស់Android Smartphone ទាំងអស់ដែលមិនទាន់មានអក្សរខ្មែរយូនីកូដ ហើយមានបំណងចង់ឲ្យទូរសព្ទរបស់ខ្លួនអាច ប្រើប្រាស់អក្សរខ្មែរបានពេញលេញ នោះក្រុមការងារCAUG នឹងតម្លើងឲ្យដោយមិនយកលុយ ក្នុងកម្មវិធីបារខែមកំពង់ចាម នៅថ្ងៃទី ២៤-២៥ សីហាខាងមុខនេះ។លោក បូរី ឈុនឡេង Adminក្រុមCAUG បានលើកឡើងថា ក្រុមការងារCAUG បើកយុទ្ធនាការតម្លើងពុម្ពអក្សរខ្មែរលើSmartphone Android នេះមិនមែនជាលើកទីមួយទេ ប៉ុន្តែក្រុមរបស់លោក ធ្លាប់ធ្វើពីរដងរួចមកហើយ គឺនៅបារខែម បាត់ដំបង និងសៀមរាប។ប្រធានដឹកនាំចលនារួមចំណែកពង្រីកការប្រើប្រាស់អក្សរខ្មែរឲ្យ កាន់តែមានវិសាលភាពកាន់តែធំធេងលើវិស័យបច្ចេកវិទ្យាទូរសព្ទដៃ ដែលបច្ចុប្បន្នជានិស្សិតជំនាញIT ឆ្នាំទី ៣ នៅសៀមរាប លោក ឈុនឡេងបន្តថា ទូរសព្ទAndroid ស៊េរីទំនើបគឺOS របស់Smartphone នោះត្រូវមានVersion ចាប់ពី 2.3.3 ឡើងទៅ។មូលហេតុដែលរុញច្រានឲ្យក្រុមយុវជនស្ម័គ្រចិត្តខាងលើនេះ គឺដោយសារគេយល់ថាបើប្រព័ន្ធប្រតិបត្តិការទាបជាង Android 2.3.3 Gingerbread នេះជាOS ស៊េរីចាស់ណាស់ទៅហើយ ត្បិតសព្វថ្ងៃAndroid Smartphone បានអភិវឌ្ឍរូបរាងរហូតដល់ 4.3 ទៅហើយ។ការUpdate Moon OS ឲ្យទៅជាភាសាខ្មែរក្រុមអ្នកប្រើប្រាស់អ៊ែនដ្រយដ៍កម្ពុជា ត្រូវបានផ្ដួចផ្ដើមគំនិតបង្កើតឡើងដោយស្ថាបនិកវ័យក្មេងMoon OS លោក ធីម ច័ន្ទឬទ្ធី កាលពីឆ្នាំ ២០០៨។ បច្ចុប្បន្នក្រុមCAUG នេះមានសមាជិក ១០នាក់ ដែលសុទ្ធតែអ្នកមានជំនាញ និងចំណេះដឹងលើផ្នែកAndroid OS មកពី ភ្នំពេញ មណ្ឌលគិរី និងសៀមរាប។អាន៖ ខ្សែជីវិតពិតរបស់ធីម ច័ន្ទឬទ្ធីបើយោងតាមលោក បេ ចន្ត្រា ប្រធានគណៈកម្មការគ្រប់គ្រងកម្មវិធី បានរំលឹកពីបារខែមថា កម្មវិធីនាថ្ងៃទី ២៤-២៥ សីហា នៅខេត្តកំពង់ចាមខាងមុខ នៅសាកលវិទ្យាល័យជា ស៊ីម កំចាយមារលើកទី ១០ហើយ ដែលក្នុងនោះប្រព្រឹត្តិទៅនៅរាជធានីភ្នំពេញ ៦លើក សៀមរាប ២លើក បាត់ដំបង ១លើក និងក្រុងព្រះសីហនុ ១លើក។ បារខែមជាព្រឹត្តិការណ៍ជួបជុំ និងចែករំលែកមួយ ត្រូវបានបង្កើតឡើងនៅកម្ពុជាឆ្នាំ ២០០៨ ដែលមានការចូលរួមពីសំណាក់អ្នកប្រើប្រាស់ អ្នកជំនាញIT វ័យក្មេង Developer ម្ចាស់អាជីវកម្ម សហគ្រិន អង្គការ ស្ថាប័នដទៃទៀតជាច្រើន ព្រមទាំងវត្តមានរបស់សិស្សានុសិស្សពីគ្រប់មជ្ឈដ្ឋានដែលមានចំណាប់ អារម្មណ៍។មិត្តអ្នកអានយល់យ៉ាងណាចំពោះ សកម្មភាពមិនគិតពីកម្រៃ ដើម្បីលើកស្ទួយអក្សរសាស្ត្រខ្មែរលើទូរសព្ទដៃឲ្យកាន់តែទូលំទូលាយ នេះ? នរណាខ្លះប្រើAndroid Smartphone ហើយអត់ទាន់អាចប្រើយូនីកូដខ្មែរពេញលេញ?ប្រភព៖ Sabay
